KALIBO, Aklan—Ginpasaka eon it Municipal Disaster Risk Reduction and Management Office ukon MDRRMO New Washington ro andang alert status sa “Blue Alert” bilang pagpahaum sa selebrasyon it kapistahan ni Sr. San Juan de Bautista sa Lunes, hunyo 24.
Suno kay Nicanor Denila Jr., head it MDRRMO New Washington nga maga-focus sanda sa andang deployment sa Barangay Tambak bangud sa mga nagkaeain-eain nga mga aktibidad eabi eon ro karera it baroto ni mayor Jessica Panambo ag kiay-kiay sa baybay ukon splash party kun sa siin ginaeauman nga maabu ro magatan-aw.
Agud nga masiguro ro kaeowasan it mga pumueuyu eabi eon ro mga bisita nga magapaligos sa baybay, ginpahayag ni Denila nga una sa blue alert ro andang emergency team ag magatukod it tatlong stations kun sa siin magiging kabulig nanda ro augmentation team nga ginaeakipan it 10 nga responders it PDRRMO ag andang mga kagamitan nga ginpadaea ni governor Joen Miraflores, Philippine Coast Guard , BFP , PNP, army reservist ag iba pang natungdan nga ahensiya it gobyerno.
Daywang speed boat ro andang ginapahaum para sa pag-responde sa anuman nga emerhensiya eabi eon ro insidente it pagka eumos.
Padumdum nana nga indi eon magpaligos kon hilong ag bantayan ro mga unga nagapaligos.
