Uwa it namonitor nga mga pagbaha ro Municipal Disaster Risk Reduction Management Office ukon MDRRMO maskin nga bumuhos ro mabaskog nga uean sa sueod it sang adlaw kahapon.
Suno kay MDRRMO Kalibo head Terrence Jun Toriano nga base sa andang monitoring hay manaba ro level it tubi sa Aklan river.
Maskin sa mga low lying areas sa banwa it Kalibo hay uwa sanda it namonitor nga mga pagbaha-baha.
Una kara, ginpaidaeom sa red flood early warning ro bilog nga probinsya it Aklan bangud sa mga posibleng pagbuhos it mabaskog nga uean.
Bangud kara, haeos tanan nga klase sa eskwelahan hay ginsuspinde it mga natungdan nga LGU’s para sa kaeowasan it mga estudyante kamana man maging ro opisina sa ibang banwa hay ginsuspinde kahapon nga adlaw.
Sa makaron hay nagapadayon ro monitoring it MDRRMO bangud nga uwa pa nakaguwa sa Philippine Area of Responsibility ro Bagyong Betty.
