KALIBO, Aklan—Arestado ro sangka 26 anyos nga meat vendor nga ginakabig nga street level individual sa ginpatigayon nga drug buy-bust operation it Kalibo Municipal Police Station ag Provincial Drug Enforcement Unit, adlaw it Huwebes, Oktubre 17 sa Oyo Torong St. Brgy. Poblacion, Kalibo.
Ro naarestong suspek hay ginkilaea kay Raffy alyas “Aping” Estomata, tindero it karne it baboy ag residente it nasambit nga lugar.
Naging madinaeag-on ro ginkasa nga Anti-Illegal Drugs operation it kapulisan nga nagresulta sa pagka-aresto sa suspek ag pagkarekober it P1,000 nga buy-bust money kabaylo it daywang sachet it ginadudahan nga shabu ag iba pang mga non-drug items.
Narekober dugang ro 13 nga sachet nga nakasueod sa kaha it sigarilyo.
Ginpahayag ni Kagawad Kim Melgarejo nga mabuhay eon nga gina-surveillance ro suspek it PDEU ag gin target nanda raya nga i-operate ko nagtaliwan nga Ati-Atihan festival, apang naging maila.
Magapangatubang ro suspek sa reklamong pag-eabag sa Republic Act 9165 ukon Comprehensive Dangerous Drugs Act of 2002.
Nauna eon nga ginpromisa it P/Major Frenzy Andrade nga nagatindog makaron nga OIC chief of police it Kalibo MPS ag head it PDEA-Aklan nga mas pang pagahugtan ro kampanya it iligal nga droga agud nga maabot ro target nga drug-free ro Aklan eabi eon ro banwa it Kalibo.
