KALIBO, Aklan—Gin-extend pa it daywang domingo ro Modified Enchanced Community Quarantine ukon MECQ status sa probinsiya it Aklan it Inter-Agency Task Force for the Management of Emerging Infectious Diseases ukon IATF-EID hasta sa Agosto 31, 2021 agud nga mataw-an it kahigayunan ro probinsiya nga ma-kontrol ro mas pa nga pagtinaas it kaso it COVID-19.
Suno kay Aklan Governor Florencio Miraflores nga raya hay nagakahueugan nga magapabilin ro hugut ro border control checkpoints, kun sa siin magakinahangean it quarantine ag travel pass ro sin-o man antes nga makaguwa it andang mga baeay.
Ro operasyon it mga establisimento komersiyal ag mga opisina hay hasta alas-6:00 it agahon hasta alas-4:00 it hapon.
Nagapabilin man nga sarado ro mga personal services kapareho it mga barber shops ag salons.
Ro mga restaurants hay bukas eamang para sa take-out order.
Samtang, gindugang pa ni Governor Miraflores nga maskin nga naghagan-hagan, apang nagapabilin nga mataas ro positivity rate ag average daily attack rate sa probinsiya.
Mag-eowas kara, haeos punuan man ro mga covid ward it mga ospital.
Raya hay nagapatimaan nga may local transmission ag posibleng nakasueod eon ro mas peligroso nga delta variant it COVID-19.
Nakadugang pa suno kana sa pagsirit it kaso hay ro pagpasugot sa kada local government units ro home quarantine bangud sa kakueangan it quarantine facility.
Angot kara, nag apela ro gobernador sa tanan nga mga pumueuyu nga padayun nga magsuksok it face masks ag face shield ag ro pag-obserba it social distancing.
Gindayaw man nana ro pilang banwa nga nagpatuman it ‘no movement Sunday’ agud nga mapanaba ro peligro it COVID infections.
