KALIBO, Aklan–Padayun ro pagkontra it medical community sa nasyon sa kontrobersyal nga Senate Bill 2239 ukon Vaporized Nicotine and Non-Nicotine Products Regulation Act matapos nga maging eubus nga laye ko Martes, Hulyo 26.
Naging laye raya sa pihak it panawagan it Department of Health ag FDA kay Pres. Ferdinand “Bongbong” Marcos nga raya hay baeabagan.
Suno kay Dr Anton Javier, program officer it Southeast Asia Tobacco Control Alliance nga gina-respeto nanda ro desisyon it kongreso ag indi man nanda mahambae kon nakaangkon it manipulasyon ro pagkapasa kara.
Gindugang pa nana nga padayun sanda nga magapanindugan nga may peligro nga daea ro vaping sa ikamayad nga eawas.
Partikular nga ginkwestiyon nanda ro pagpanaba sa age limit para sa paggamit it vape sa 18 halin sa 21 anyos.
Mag-eowas kara, ro pagtau it regulatory powers sa Department of Trade and Industry halin sa Food and Drug Administration.
Para kanda , owa it kinamatarung ro DTI agud nga mag-regulate it vape products bangud raya hay angot sa ikamayad nga eawas.
Kadungan kara, nag apela si Dr. Javier sa mga ginikanan nga bantayan ro andang mga inunga agud nga makalikaw sa bisyo.
Kapareho it sigarilyo, ro vape sigon hay maka-aeadik man bangud sa anang nicotine content.
