Kalibo Aklan——–Samtang owa pa it bakuna, ginpadumdum it sangka medical expert nga indi gihapon maging kampante ro publiko ag padayun nga ipatuman ro mga simpleng precautionary measures agud nga maprotektahan ro kaugalingon ag ro iba pa kontra sa coronavirus disease 2019 (COVID-19).
Suno kay Dr. Nelly Sucgang nga kaabuan sa mga tawo nga nakakaangkon it impeksyon hay nakaexperiensiya it bukon it grabeng sintomas ag nagamayad.
Apang ro delikado hay kon makaangkon it grabeng sakit eabi eon ro mga katigueangan ag may dati nga ginabatyag nga baeatian.
Angot kara, ginlaygay ni Dr. Sucgang nga pirmeng hugasan ro mga alima gamit ro hand sanitizer nga may alcohol ukon hugasan gamit ro sabon ag tubi.
Pirme sigon nga ginagamit ro mga alima agud nga buytan ro mga bagay nga posibleng kontaminado.
Likawan sigon nga buytan ro mata, ilong ag bibig.
Kon kontaminado ro mga alima, pwedeng maisaylo ro virus kara ag posibleng magsueod sa eawas ag magatuga it sakit.
Dapat man suno kana nga masigurado nga kon naga ubo ag bahaon , ginasunod ro tamang respiratory hygiene.
Buot hambaeon nga ginatakpan ro bibig ag ilong gamit ro sueod it siko ukon tissue .
Insigidang ipilak ro nagamit eon nga tissue sa basurahang may takop ag maghugas it alima.
Ginpaathag ni Dr. Sucgang nga kon nagabahaon ukon naga-ubo, ro mga maisot nga droplet halin sa ilong ag bibig hay posibleng may virus ag mikrobyo.
Dapat man sigon nga likawan ro mga tawong lugar ag maeapit nga pakikipag-istorya sa mga tawo nga may eagnat ukon ubo.
Mag doble dahan suno kana ro mga naga edad it 60 pataas ukon may dati eon nga baeatian kapareho it altapresyon, diabetes, sakit sa puso ag baga ukon kanser.
Ipabilin ro indi magnaba sa sang metrong distansiya kapin kon ro kaatubang hay may eagnat ukon ubo.
Importante man suno kay Dr. Sucgang nga magpabilin sa sueod it baeay ag indi anay mag-agto sa trabaho ag iba pang lugar kon maeain ro pamatyag bangud nga mas madasig ro pagpamayad kara ag malikawan ro pagkalhit it sakit sa ibang tawo.
Magpakonsulta sa doctor kon may eagnat, ubo ag nabudlayan sa pagginhawa agud nga mataw-an it nagakaigo nga laygay ag malikawan nga makatapon sa iba.
Dapat suno kana nga masayuran it publiko ro mga sintomas it COVID-19 , kun sa siin, kaeabanan kara hay naga umpisa sa eagnat ag mamaea nga ubo.
