KALIBO, Aklan—Sa pihak it ginapangatubang nga pandemya tuga it COVID-19, padayun ro ginatao nga serbisyo it mga health centers ag public hospital agud mabantayan ro ikaayong eawas it publiko.
Raya ro naging pahayag ni Provincial Health Officer 1 Dr. Cornellio Cuatchon Jr. it Provincial Health office ukon PHO-Aklan kasunod it ginaselebrar makarun nga adlaw nga World Rabbies Day.
May kaangtanan kara, uman nga nagpadumdom sa publiko si Dr. Cuatchon nga raya hay sangka grabe nga klase it sakit.
Suno kana, ro rabbies hay pwedeng mabo-oe it sangka indibidwal pamaagi sa pag-angkit it sangka ayam ukon kuring.
Kada dag-on may una nga 200 hasta 300 nga mga Pilipino ro nagakamatay bangud sa rabies, ag masobra 100,000 man ro ginabakunahan.
Raya hay pwede man nga mabo-oe pamaagi sa eaway ag ihi it ayam, kuring ag iba pang kasapatan.
Kung tinamaan ro pasyente it rabies, magahueat pa it 3 hasta 8 dominggo bago magkaangkon it sintomas.
Ro sintomas it rabies hay ro pagpangmanhid sa may parte it eawas nga naninahan, pagwala, pag-eaway ag pagpanig-a sa may parte it uyahon.
Kon makaangkon eun it sintomas it rabies hay malisod eun rayang maboeung.
Bangud kara, gina-engganyo man ro publiko nga magpadueong sa mga health centers ag ospital it mas timprano agud malikawan ro mas grabe pa nga sitwasyon.
