KALIBO, Aklan—Ginapadasig eon it mga medical institutions ag pharmaceutical companies sa Japan ro pag-develop it bueong ag bakuna para sa coronavirus infections.
Suno kay Bombo International Correspondent Johnny Sato Gallos, tubong Romblon ag presenteng missionary pastor sa Fuji, Japan nga maabu ro nagaeaum nga matapos eon ro clinical trial partikular ro pagtumod sa side effects kara.
Ginasugid nga ro na-develop nga bueong para sa influenza hay nakita nga pwede man nga makabueong sa mga may COVID-19.
Sa pihak nga parte, gindugang pa kara nga mas nauna pa ro Japan nga tinamaan it virus, apang mahinay ro pag-abu it mga kaso.
Nakakita sigon sanda it mga tikang kon paano nga ma-kontrol ro sakit.
Apang nagkumpiyansa ag naghaeuga sa pilang mga ginapatuman nga protocols ro Japan rason nga ko nagtaliwan nga mga inadlaw hay nataeupangdan ro uman nga pag-abu it kaso eabi eon sa Tokyo, Japan.
Sa makaron hay uman eon man nga naalarma ro gobyerno.
Maskin nga owa it lockdown sa japan mag-eowas sa Hokkaido, nagapabilin nga sarado ro mga eskwelahan ag pilang mga establisimento.
Ginsuhestiyon nana sa gobyerno it Pilipinas nga indi anay magkumpiyansa makaron bangud nga naga-umpisa pa eamang suno kana ro away sa sakit.
