KALIBO, AKlan—Nagakaubusan eon ro stock it medical mask sa mga nagkaeain-eain nga parmasya ukon botika sa bilog nga probinsya it Aklan.
Suno kay Philippine Pharmacy Association President-Aklan Chapter Melissa Dela Cruz nga raya hay bangud sa limitado nga supply ag sa madasig nga pagtaas it demand.
Raya hay kaangot gihapon sa ginakabaeak-ean nga pagkalhit it Novel-Coronavirus maskin nga nagapabiling N-CoV free ro bilog nga probinsya.
Mag-eowas sa regular mask, uwa eon it mabakae nga N-95 mask maskin siin nga botika sa probinsya bangud sa kawad-an it supply kara.
Kon mag-abot gidman sigon ro andang mga orders hay nagabuhay eamang raya it hasta sa daywang adlaw bangud sa mataas nga demand makaron partikular sa banwa it Kalibo.
Ginpaathag nga antes pa man nagkinahang-ean ro Aklan hay nauna eon nga nagkinahang-ean kara ro Metro Manila ag ro probinsya it Batangas kasunod it pag-eopok it bulkang Taal.
Sa makaron suno kana hay limitado eamang sa napueong bilog kada tawo ro andang ginabaligyaan it regular mask agud nga maghilisamit ro tanan.
Samtang sa pihak nga parte, gindepensahan ni Philippine Pharmacy Association ro kapareho kara nga drugstore owners kasunod it ginasugid nga overpricing ukon pagdoble sa presyo it nasambitan nga face mask.
Suno kana, inde nana mabasoe ro iba nga magpataas it presyo bangud nga mismong ro supplier hay nagapataas man.
Ro presyuhanay makaron it regular mask hay P6 hasta it P10 halin sa dating P5.
Nasayuran nga may tatlong klase it medical mask nga pwedeng gamiton nga ginakaeakipan it surgical mask, N-95 mask, ag R95 mask.
Ro N-95 mask hay ginagamit agud nga malikawan nga makahanggop it mikrobyo ag ro R-95 kon ginaeauman nga makahanggop it mga oil-based nga kemikal kaparehas it insecticide samtang ro surgical mask hay bukon it para sa tanan partikular kon may sakit nga kaparehas it emphysema, bronchitis ag sakit sa tagipusuon.
Suno pa kay Dela Cruz, siguradong makalikaw sa makamaeatay nga sakit kon ipabilin nga malimpyo ro kaugalingon ag mas pang pabaskugon ro immune system agud nga masuk-ean ro 2019 N-CoV.
