Lastro sa likod nga porsyon it eawas ro ginatan-aw nga gintunaan it kamatayon it daeaga nga nauna eon nga naduea ag ko ulihi hay nasapwan eon lang nga uwa eon it kabuhi sa binit it baybayon nga sakop it Brgy. Baybay, Makato.
Suno kay P/Capt. Merreifin Carisusa, acting chief of police it Makato PNP Station nga raya ro nagguwa sa resulta it otopsiya nga ginpatigayon sa bangkay it biktimang si Myla Sistorias Nagales, 32 anyos ag residente it Brgy. Galicia sa banwa it Madalag.
Posible sigon nga sa suba pa eamang sa andang lugar hay nahueog ro biktima ag tumama ro anang likod sa matig-a nga bagay kamana man pwede nana raya nga mabueo sa pag-anod kana.
Madumduman nga ro bangkay hay nakita ni Ronald Tibulan it Dapdap, Tangalan ag sa imbestigasyon it pulisya hay nakit-an eagi raya it nina sa ueo ag mga gasgas sa eawas nga ginapatihan nga tuga it pagbunggo-bunggo kara bangud sa mabaskog nga sueog it tubi.
Nauna eon nga nagpanawagan ro pamilya it biktima sa Bombo Radyo Kalibo matapos nga naduea ro biktima nga sangka special child.
Gin-aywanan sigon raya it anang ina sa baeantayan it saeakyan sa Brgy. Mercedes sa nasambit nga banwa agud nga magdeliver it katre, apang sa anang pagbalik hay owa eon raya.
