KALIBO, Aklan—Medyu may ginapatuman nga Martial Law sa Wahington DC pilang adlaw antes ro nakataeanang pagpanumpa ni President-elect Joe Biden it Estados Unidos sa Enero 20.
Suno kay Bombo International Correspondent Boots Felixberto it Washington DC, USA nga mag-eowas sa nakakalhit nga tropa it national guard hay ginbutangan eon barikada ukon barb wire fence maeapit sa White House ag iba pang government buildings.
Gindugang pa kara nga plano man nga temporaryong ipasarado ro National Mall, ro lugar nga gintaeana para sa publiko nga gustong mag–witness sa inauguration day.
Kadungan kara, nag apela eon sigon si Mayor Muriel Bowser sa mga bisita nga indi eon mag-agto sa lugar.
Ginatantiya suno kana nga 20,000 nga mga tropa ro gindeploy sa nasambit nga lugar.
Posibleng ginhimo sigon ro hugut nga seguridad agud nga indi eon mauman ro bayolenteng hubeag protesta it linibo nga mga tagasuporta ni outgoing president donald trump ko nagtaliwan nga domingo sa Congress sa paghandum nga mabaeabagan ro election victory ni Biden kun sa siin sangka police officer ag ap-at nga protesters ro namatay.
Dugang pa ni Felixberto nga kanselado eon ro tanan nga mga reservations it hotel ag house-sharing sa palibot it Washington para sa maabot nga masunod nga domingo sa inagurasyon.
Ro mga karsada maeapit sa Capitol nga ginsueod it mga violent protesters ko enero 6 hay ginsarado eon.
Ginpasarado man it National Park Service ro Washington Monument para sa mga naga-tour kamana man ro 13 nga ka metro stations umpisa sa sabado nga adlaw rason nga eubus nga apektado ro mga empleyado.
Magiging kabulig it National Guard ro Capitol Police officers sa pagpatuman it laye engkasong may magahana nga maga-eabag.
Sa pihak nga parte, kapin eon sa 70 nga ka tawo ro naaresto nga nakaangkon it partisipasyon sa riot gamit ro facial recognition software.
