KALIBO, Aklan–Ginkumpirma it pamunuan it Municipal Economic Enterprise Development Office ukon MEEDO-Kalibo nga nakakumpiska sanda it kapin sa 68 ka mga depektibong kilohan sa sueod it Kalibo Public Market umpisa Hulyo hasta Oktobre.
Ro mga nasambit nga kilohan hay ginpangsamad sa sueod it bisinidad it tindahan para ipakita sa publiko ro pag-aksyon it lokal nga gobyerno.
Suno kay MEEDO-Kalibo Head Mary Gay Quimpo-Joel nga nagapatigayun sanda it random inspection sa sueod it merkado publiko para masiguro nga nagasunod ro mga negosyante sa ginplastar nga mga sueondanan.
Gin-aku man kara nga maabu eon sanda nga nabaton nga reklamo angot sa mga depektibo nga kilohan it pilang vendors sa tindahan.
Samtang, ginpaathag man kara nga may mga trained personnel man sanda para mag-ayos it mga samad nga kilohan kung siin pwede nga magpaayos ro mga vendors.
Mas mayad sigon nga mataw-an eagi it aksyon ro nasambit nga problema agud nga malikawan ro pagpamintaha sa mga bumaeakae.
