KALIBO, Aklan — Ginklaru it Municipal Economic Enterprise Development Office (MEEDO)-Kalibo nga owa nanda ginputuean it linya it kuryente ro pilang section it Kalibo Public Market .
Raya hay matapos nga magreklamo ro mga vendors eabi eon sa fish section kat maduea-an it supply it kuryente bandang alas-5:30 agahon it Huwebes, Setyembre 5.
Suno kay MEEDO head Mary Gay Quimpo-Joel nga matapos nga makaabot kana ro nasambit nga reklamo hay insigida nana nga ginmanduan ro officer-in-charge nga market supervior nga magpatigayon it pag-usisa .
Posible suno kana nga nakaangkon it loose connections sa sueod it tindahan ukon sa linya it Akelco mismo.
Ko ulihi hay naibalik man ro supply it kuryente matapos nga maayos it electrician it LGU-Kalibo.
Nasayuran nga matapos ro insidente hay nakaangkon it espekulasyon ro mga vendors nga gin utdan sanda it kuryente agud nga mapilitan nga mag-alsa balutan paagto sa gintaeana kanda nga relocation site sa Kalibo Eastern Side Terminal sa San Lorenzo Drive, Barangay Andagao kun sa siin ko Setyembre 5 ro deadline para kara.
