KALIBO, Aklan — Target it lokal nga gobyerno it Kalibo nga maumpisahan eon ro construction it bag-ong Kalibo Public Market pagkatapos nga makasaylo ro mga vendors sa andang relocation site sa dating Eastern side terminal sa San Lorenzo drive, Brgy. Andagao, Kalibo sa Setyembre 8 it makaron nga dag-on.
Raya ro ginpahayag ni Mary Gay Quimpo Joel, head it Municipal Economic Enterprise Development Office (MEEDO)-Kalibo .
Suno kana nga sa oras nga mabakante it mga stall owners ro tindahan hay pagabutangan raya it kordon , sangka patimaan nga maga-umpisa eon ro construction work para sa modernization it tindahan.
Ginpahayag dugang nga tapos eon ro mga gin-obra nga stalls it engineering department it LGU-Kalibo.
Pagataw-an man suno kana it choice ro mga vendors kon paga-okupahan ro mga gintukod nga stalls ukon magapa-obra sanda it andang kaugalingon nga baealigyaan sa kilid it daeanon pasueod sa relocation site .
Raya hay bangud nga 161 eamang nga stalls ro gin-obra nga bukon it bastante para sa mga vendors ag stall owners it tindahan.
Ro magapa-obra it andang kaugalingon nga pwesto ag papag hay owa it anuman nga pagabayaran nga renta sa munisipyo hasta nga matapos ro construction ag makabalik sanda sa tindahan.
Sa pihak nga parte, ginatun-an pa sigon makaron it finance department it munisipyo kon pagapasugtan ro hinyu it mga negosyante sa meat ag fish section nga indi anay magbayad it rental ukon makaangkon it moratorium of payment sa sueod it an-um nga buean.
Apang para kay Quimpo-Joel bastante eon ro tatlong buean agud nga indi man sanda malugi.
