KALIBO, Aklan—Plano makaron it Municipal Economic Enterprise Development Office (MEEDO)-Kalibo nga butangan it pilang ka mga Closed-Circuit Television (CCTV) ro Kalibo Public Market.
Raya hay kasunod it mga napabalita nga insidente it panakawan sa sueod it tindahan.
Suno kay MEEDO-Kalibo Head Mary Gay Quimpo-Joel, pila sa mga area nga target nanda nga butangan it CCTV hay ro meat and fish section ag nalikod nga porsyon it wet market.
Ginpabugae pa kara nga nagabalor it masobra P100,000 ro andang gin-purchase nga CCTV kung siin may una raya nga mataas nga kalidad ag night vision.
Ginpahayag dugang nga nagbaylo sanda it security personnel nga magabantay sa tindahan kun gabi-i bangud natukiban nga nag-expired eon ro kontrata it naunang security agency ko Disyembre 2021.
Nagaeaum si Joel nga mapundo eon ro mga insidente it panakawan nga nagtuga it perwisyo ag kalugian sa pilang negosyante.
