KALIBO, Aklan – Mahimo pasakaan it kaso ro 17-anyos nga nadakpan nga nagpanakaw sa Brgy. Tigayon kahapon nga adlaw.
Ginklaro ni P/Major Willian Aguirre, deputy chief of police ag public information officer it Kalibo Municipal Police nga ro mga halin sa 15 anyos hay mahimo eun makasuhan kun raya hay naghimo it krimen o may “act with discernment” ukon sayod nana ro anang naubra nga saea ukon bukon ag sueod karun ro nasambitan nga suspek.
Panindugan nana nga indi sigon pwede nanda nga mairason nga sanda hay menor-de-edad.
Matandaan nga ro 17-anyos ag ro 22-anyos hay nadakpan sa andang ginhimo nga pagpanakaw sa sangka baraka sa Brgy.Tigayon sa may diversion road, kun siin nakabueo sanda it sigarilyo ag kwarta.
Pahayag ni P/Major Aguirre nga raya nga mga suspek hay pasaway man kontra sa pilang mga layi.
Uwa sigon it ginapili ro layi bisan nga menor-de-edad eabi eun kun sayod eun nga ro anang ginahimo hay saea.
Ro iba sigon hay ginadaea sa mga youth centers ag kun mag18-anyos hay andang atubangon ro andang saea.
Masayuran nga narekober eun man ro mga ginpanakaw it mga suspek apang anda raya nga gindaea sa Municipal Social Welfare and Development Office.
Pahayag ni Aguirre nga sanda nga kapulisan kaibahan ro mga Local Government Units hay nagatingob agud nga masolusyunan ro nasambitan nga mga problema.
Nagahimo man sigon it pagpatrolya ro Kalibo MPS agud nga masiguro nga malikawan ro mga krimen eabi eun kun gabei.
Padumdom nana nga kargo gihapon it mga ginikanan ro mga menor-de-edad apisar nga raya hay makabig nga mga young adult.
