KALIBO, Aklan—Plano makaron it Banga Municipal Environment and Natural Resources Office (MENRO) nga magpatigayun it clean up drive para mabuoe ro mga naanod nga basura sa mga kasubuaan ag kaeanasan matapos nga maguba ro retaining wall it andang Municipal dump site sa Brgy. San Isidro, Banga.
Suno kay MENRO-Banga Designate Myrnalyn Suante, sa idaeom eon it rehabilitasyon ro dump side kung siin may pondo raya nga kapin sa P1.2 million.
Ginapatihan nga bangud sa pagbubu it mabaskog nga uean ag pilang ka mga pagbaha ko nagtaliwan nga dominggo rason nga naguba ro pader kara.
Dugang pa ni Suante nga may kabuhayon eon ro retaining wall it nasambit nga dump site bangud dag-on 2000 pa raya ulihing gin-ayos.
Angot kara, may inisyal eon man sigon sanda nga pag-istorya it mga kapitanes it Brgy. San Isidro ag Venturanza para mag-usoy it tawo sa igapatigayun nga clean up drive.
Ro pondo nga pagagamiton para sa nasambit nga proyekto hay pagabue-on sa Solid Waste Program it taeatapan.
Posible sigon nga mag-umpisa ro clean up drive sa masunod nga dominggo kung siin maga-identify sanda it lugar nga pagabutangan it mga makolektang basura para mapadasig ro paghakot it backhoe.
Ro Municipal dump site hay may kabilugan nga land area nga 2.3 hectares kung siin 1,200 square meters ro presenteng ginagamit.
Madumduman nga nagtuga it mabahoe nga perwisyo sa mga residente eabi eon sa mga mangunguma ro pagkalhit it sangkaterbang basura.
