KALIBO, Aklan—Kapareho sa ibang banwa sa probinsya it Aklan, owa eon man it matabo nga selebrasyon it Ati-atihan Festival sa isla it Boracay makaron nga dag-on 2021.
Raya hay bilang pagdahan kontra sa nagapadayun nga paeag it Coronavirus Disease 2019 ukon COVID-19.
Suno kay Malay Mayor Frolibar Bautista, may igapatigayun nga ap-at nga misa sa simbahan it Brgy. Balabag makaron nga adlaw.
Raya hay naka-schedule makaron nga alas-6:00 hasta alas-7:00 ag alas-7:00 hasta alas-8:00 it agahon kamana man sa hapon ro misa hay maga-umpisa it alas-4:00 hasta alas-5:00 ag alas-5:00 hasta alas-6:00 it gabi-i.
Bilang pagsunod sa ginapatuman nga protocols, kapin sa 50 porsyento eamang it kapasidad it simbahan ro andang ginapasugtan nga makasueod.
Buot hambaeon kara hay 436 eamang nga indibidwal ro pwedeng magsueod sa simbahan it Brgy. Balabag.
Kaangot kara, may ginbutang man sigon sandang control point sa pilang areas para mag-isyu it ticket.
Sa oras nga maubos eon sigon raya hay indi eon pwedeng magdiretso pa ro mga pumueoyo.
Suno sa alkalde, nagkasa sanda it re-routing sa pilang karsada sa Boracay halin alas-6:00 it agahon hasta alas-6:00 it hapon makaron nga adlaw.