NATIONAL News — Nagapanawagan ro Department of Health sa publiko nga indi magpanic kasunod it balita nga sangka Mexican actor ro una makaron sa kritikal nga kondisyon matapos nga dapuan it peligroso nga bacterial infection sa anang pagbisita sa Pilipinas kan-o eamang.
Ginkumpirma ni DOH spokesman Albert Domingo nga ro 44-anyos nga Mexican actor nga si Manuel Masalva hay ginpaidaeum sa medically induced coma bangud sa bacterial infection.
Si Masalva hay may naging papel sa pelikulang “Narcos: Mexico” sa Netflix.
Nagbisita imaw sa Pilipinas ko Marso 14 ag nagbiyahe paagto sa Dubai ko Marso 18.
Suno sa anang manager, nagmasakit ro aktor daywang adlaw pag-abot sa United Arab Emirates.
Sa pihak kara, ginpahayag it DOH spokesman nga owa it dapat nga ikabaeaka ro publiko bangud nga ginabaton it eawas ni Masalva ro ginatau kana nga antibiotics.
Ginatumod man it ahensiya ro lugar nga gin-agtunan it aktor sa Pilipinas ag owa man sanda it nabalitaan nga may parehong kaso it bacterial infection idtu.
