Ginhangkat it mga abogado ni dating Pangueong Rodrigo Duterte ro hurisdiksyon it International Criminal Court (ICC) angot it mga kasong crimes against humanity halin sa madugong kampanya kontra droga it anang administrasyon.
Sa pagsumite ku Mayo 1, ginpahayag nanday Atty. Nicholas Kaufman ag Dr. Dov Jacobs nga nadueaan eon it hurisdiksyon ro ICC matapos maghalin ro Pilipinas sa Rome Statute ku Marso 17, 2019.
Ginpamilit nanda nga kinahangean ro pagiging miyembro it sangka nasyon sa ICC sa oras it pagsasakdal, ag eumagpas eon ro petsa it withdrawal kat umpisahan ro imbestigasyon.
Ginbatikos man it depensa ro paggamit it Article 127(2) it Rome Statute sa kaso ni Duterte, nga bukon sigon nagakadapat.
Samtang, nagpanindugan ro ICC nga may hurisdiksyon raya sa mga krimeng nagtuhaw samtang miyembro pa ro Pilipinas. Sa report ku Marso 12, ginpahayag it korte nga may ebidensiyang naga-hambae nga si Duterte hay may responsibilidad sa libo-libong kaso it pagpatay halin Nobyembre 2011 hasta Marso 2019 bilang indirect co-perpetrator.
Naaresto si Duterte ku Marso 11, 2025 pag-abot halin sa Hong Kong. Ginpasibangdan imaw nga nagtatag, nagpondo, ag nag-armas sa mga grupong imbolbado sa pagpamatay. Imaw hay gindaea sa The Hague oara atubangon ro mga pasibangud.
