KALIBO, Aklan — Nadugangan pa ro numero it mga hotels ag resorts nga ginpasugtan it Boracay inter-agency task force nga maka-operate sa isla it Boracay.
Base sa ginpaguwang listahan it Department of Tourism (DoT) nga may petsang Nobyembre 26, 2018, halin sa 211 hay nag-abot eon sa 243 ro mga compliant establishments nga may kabilugang 9,248 rooms nga pwedeng magbaton it bookings ag reservations.
Nauna eon kara nga nagpaandam ro DoT nga pwedeng makasuhan ro mga establisimentong uwa pa nakasunod sa requirements it Department of Environment and Natural Resources (DENR) ag Department of Interior and Local Government (DILG) apang nagabaton it mga booking reservations ag nagabutang it mga online promotions.
Padayon man ro padumdom it DoT sa mga turista nga magpa-book eamang sa mga hotels ag resorts nga may accreditation sa ahensiya.
