KALIBO, Aklan — Ginpilahan it mga Akeanon ro registration umpisa ko Miyerkules nga adlaw, Oktubre 16 nga magatapos makaron nga adlaw, Oktubre 18 agud nga maka-renew ag maka-apply para sa Philippine passport pinaagi sa Passport On Wheels ukon POW sa kilid it ABL Sports and Cultural Complex sa Provincial Trade Hall .
Suno kay Jenica Ann dela Peña, passport coordinator it POW nga ko Miyerkules nga adlaw hay naga-abot sa masobra sa 600 nga indibidwal ro nakapa-rehistro samtang kahapon ag makaron nga adlaw it Biyernes hay tig-700, kun sa siin kaabuan sa mga nag-apply hay mga dating overseas Filipino workers, planong mag-abroad ag mga bag-ong graduate .
Nasayuran nga naga-abot sa masobra sa 2,000 nga mga Akeanon ro pwedeng maka-avail kara imbes nga 1,000 slot eamang base sa request it provincial government sa Department of Foreign Affairs ukon DFA .
Ro pag-proseso kara hay pagahimuon sa Nobyembre 15 hasta 17.
Ro mga new passport applicants hay required nga magsumite it confirmed online appointment ukon COA, personal nga makapakita sa Passport On Wheels agud nga magpasa it accomplished application form, original copy it authenticated birth certificate nga gin-isyu it Philippine Statistics Authority ukon PSA ag valid identification cards nga gin-isyu it gobyerno .
Para sa mga gustong mag-renew it andang passports, ro requirements hay kapareho sa bag-ong aplikante eakip ro presenteng e-Passport, dating passport ag photocopy kara .
Hugut nga ginapatuman ro first come, first serve basis sa pagbo-oe it aplikasyon .
Ro Passport On Wheels hay sangka offshore processing center para sa DFA nga nagabaton it pag-proseso it bag-ong passports ukon passport renewal base sa DFA online meeting.
