KALIBO, Aklan—Gin-abisuhan ni League of the Municipalities of the Philippines ukon LMP-Aklan chapter president ag Ibajay mayor Joen Miraflores ro mga gustong mag-uli nga mga aklanon nga na-stranded tuga it lockdown nga makipag-angot sa Balik Akean Program it provincial government.
Ro nasambit nga programa hay ginlunsar agud nga makabulig sa mga Aklanons eabi eon ro mga estudyante ag residente nga gusto eon nga mag-uli sa probinsiya.
Ro kada banwa sigon makaron hay nagapahaum eon it andang mga COVID-19 quarantine facilities para sa mga returning aklanons, kun sa siin, required sanda nga magpaidaeum sa daywang domingo nga quarantine ag swab testing.
Required man ro mga raya nga magpakita it medical certificate nga nagapakita nga owa sanda it sintomas it sakit agud nga mataw-an it certificate of acceptance halin sa andang natungdan nga barangay ag munisipyo.
Tuyo kara nga masiguro nga owa sanda naga-angkon it covid 19 infection agud nga mapabilin nga eowas sa makamaeatay nga sakit ro probinsiya.
Sabat sigon it kada banwa ro medical, transport, accommodation ag iba pang kinahang-eanon it mga naga-uli nga stranded aklanon.
Samtang, ro mga Aklanon OFWs hay obligado nga magpaidaeum sa Reverse Transcription-Polymerase Chain Reaction ukon RT-PCR test antes nga makasueod sa probinsiya.
Ro programa hay kaparte man sigon it balik probinsiya program it gobyerno.
