KALIBO, Aklan—Nakaalerto makaron ro mga Aklanon overseas Filipino workers nga naigpit sa gyera sa tunga it Israel ag militanteng grupong Hamas.
Suno kay Bombo International Correspondent Yasmin Carnacete, nakamonitor sanda makaron sa mga posible pang matabo bangud nga sigidas ro pagpinauean it mga rocket sa war zone.
Inde sigon masarangan it iron dome it Israel nga sagngon tanan nga mga rockets nga ginabuhian it Hamas group rason nga may nagatugpa gid sa mga panimaeay ag edipisyo nga eubus nga mapeligro sa mga residente nga gintunaan pa it iba it andang hinali nga kamatayon.
Sa kada pagtunog it alarm ag sirena hay kinahang-ean nga makasueod eon sanda sa bomb shelter sa sueod it sang minuto agud nga maeowas ro andang kabuhi.
Sa pangamuyo eon lang sigon sanda nagakapit sa makaron agud nga maeowas ro andang tagsa ka kaugalingon kaibahan ro andang mga employer maskin nga may kaeayuan it sangkiri ro andang lugar sa war zone.
Sa pihak kara, ginkasubo man ni Carnacete ro makangiedlis nga kamatayon it daywang ka Filipino caregiver nga nagpakita it kabaganihan matapos nga uwa nanda gin-aywanan ro andang mga employer maskin nga gintaw-an sanda it option nga makapaeagyo.
