KALIBO, Aklan—Uman nga nagpangibabaw ro talento it mga Aklanon student matapos nga magkampeon sa ginpatigayun nga Online National Competition and International Online Robotics Competition makaron nga dag-on.
Ginakaeakipan raya nanday Ian Dale Tejares, Carl Kenneth Menguito, Ian Kenneth Ampatin ag Lorraine Isuga it Aklan Valley High School (AVHS) sa pagpanguna it andang Robotics Club coach nga si Jordan So Bartolome.
Ginpahayag ni Bartolome nga kaparte eon it andang curriculum ro pagturo it robotics umpisa ko 2019.
Ginpabugae man kara nga umpisa ko 2019 hay masami sanda nga nagakampeon sa mga ginapasakupan nga national competition kung siin ko 2021 hay nagdaog sanda sa International competition sa China.
Sa kamatuoran suno kana hay sambilog sanda sa nakabuoe it Special awards halin sa 200 ka mga eskwelahan nga nagpasakop matapos sanda nga makasueod sa top 15.
Sa robotics suno kana hay mas mahasa ro kapasidad ag abilidad it sangka estudyante pag-abot sa programming ag micro-processors.
Dikara man nade-develop ro andang abilidad kapareho it electronic skills ag verbal ability para maipresenta it mayad ro andang obra.
Gin-engganyo man ni coach Bartolome ro iba pang pamatan-on nga makaangkon it interes sa andang club para mas mapaeapad ro andang kasayuran.
