KALIBO, Aklan—Maga-umpisa eon makaron nga adlaw it Biyernes ro mga aktibidad it St John The Baptist Parish Church para sa Kalibo Señor Sto. Niño Ati-Atihan Festival ag Kapistahan it Señor Sto. Niño de Kalibo.
Suno kay Fr. Jay Velarde it nasambit nga simbahan nga umpisa Jan 10 hasta 17 hay pagahiwaton ro barangay chapel visitations it Sto. Niño ag vigils sa Tinigaw, Mobo, Bakhaw Norte, Tigayon, Estancia, Bakhaw Sur, ag Linabuan Norte.
Paga-umpisahan man makaron nga adlaw ro traditional nga Paea-pak sa Kalibo Cathedral hasta sa Jan 19 samtang ro devotional novena prayers and masses hay pagahiwaton hasta sa January 18.
Ro dawn penitential procession it mga karo ag deboto hay pagapatigayunon sa January 18, sa bisperas it kapistahan ni Sr. Sto. Niño de Kalibo.
Sa pihak nga parte, kadungan it gina-abangan nga Kalibo Sadsad Ati-Atihan contest sa Jan 18, pagahiwaton man ro Hornada, pagbendisyon sa mga tribu ag pilgrims .
Sa January 19, sa kaadlawan it kapiestahan ni Sr. Sto. Niño de Kalibo hay pagahiwaton ro pilgrims mass, grand procession ag closing liturgical rites, kun sa siin raya man ro pagtapos it sang domingo nga selebrasyon.
Sa pihak nga parte, ginpahayag ni Fr Velarde nga gina-estudyuhan nanda ro mga pamaagi agud nga maging maayos ro daeagan it mga tawo nga gustong maka-eksperyensiya it paeapak.
Magiging kabulig sigon nanda ro kapulisan ag mga tawuhan it MDRRMO Kalibo .
Ro pagpaeapak hay sangka practice nga naghalin sa mga Akeanon.
Raya hay sangka ritual kun sa siii ro imahe it santo Nino hay ginaharuan it mga deboto ag ginpahid sa bilog nga eawas sa pagpati nga makabueong sa mga sakit nga nababatyagan.
Gin engganyo man ni Fr Velardo ro mga pumueuyu , deboto ag mga turista nga dapat nga magtambong anay sa misa sa Kalibo Cathedral antes ro paeapak.
