KALIBO, Aklan — Preparado eon ro lokal nga gobyerno it Kalibo ag organizer nga Kalibo Ati-Atihan Festival Board (KAFEB) para sa nagahilapit nga Kalibo Ati-Atihan 2025 Opening Salvo sa Oktubre 4 hasta 6.
Suno kay Mark Sy, head it Barangay Affairs Office it LGU-Kalibo nga iga-feature sa first night it event si Nik Makino nga nagpasikat it kantang “moon” nga ginakaeangkagan it mga pamatan-on.
Sa pinaka-“big day” it kasadyahan sa Oktubre 5, raya hay paga umpisahan it fun run ag Zumba sa Kalibo Pastrana Park.
Pagkatapos it misa sa agahon hay pagapangunahan ni Kalibo Mayor Juris Sucro ro blessing sa bag-ong obra nga childrens playground ag grandstand nga bag-ong atraksyon sa plaza.
Bandang alas-3 it hapon hay magapatigayon it sadsad nga paga-intrahan it masobra sa 85 nga mga tribu ag grupo halin sa 17 nga banwa sa Aklan ukon katumbas it masobra sa 10,000 nga indibidwal.
Imbitado sa raya nga adlaw ro singer nga si Yeng Constantino ag iba pang DJs halin sa Iloilo.
Pagabantayan man ro masadya ag makolor nga phyro-musical fireworks para sa dugang nga kalingaw-lingawan it publiko.
Sa Oktubre 6 hay igapakilaea ro 19 nga mga kandidata para sa Binibini ng Kalibo Ati-Atihan 2025 kun sa siin may gin imbitahan nga mga showbiz personalities.
Bangud kara, hugut nga seguridad ro igapatuman it Kalibo Municipal Police Station ag iba pang force multipliers para sa kaeowasan it mga bisita ag merrymakers kamana man nga mapabilin ro peace and order sa mga venues it opening salvo.
Sa pihak nga parte, ginatinguhaan man makaron ni Mayor Sucro nga maimbitahan sa event ro pilang miyembro it first family ukon si Senador Aimee Marcos.
