KALIBO, Aklan — Nakaplastar eon ro mga aktibidad angot sa selebrasyon it makasaysayang unang anibersaryo it pagpasarado sa Boracay nga ginpangaeanan nga “Love Boracay” nga maga-umpisa sa Abril 26 hasta sa Mayo 1.
Ro sang domingo nga selebrasyon nga ginbansagan man nga “Sustainability Week” hay nagatuyo nga matur-an ro mga turista, residente ag mga stakeholders sa pag-amlig sa palibot ag pagpasaeamat man sa gobyerno sa ginhimo nga an-um nga buean nga paglimpyo ag rehabilitasyon, agud nga mapabilin ro mabaskog nga turismo sa nasyon.
Kaibahan sa mga aktibidad ro Ati-Atihan sadsad ukon streetdancing ag salubungan sa Abril 26 pagkatapos it Zumba sa beach bandang alas-6:00 it agahon sa Station 2.
Samtang, sa Abril 28, makaangkon it synchronized “Clean Up Day” sa baybayon it isla halin sa Bolabog Beach sa Ati Village hasta sa New Bolabog Road kamana man sa mga interiors it Barangay Yapak, Manocmanoc ag Balabag.
Suno sa Boracay Inter-Agency Management Group, maga-dere-deretso ro iba pang aktibidad angot sa “Love Boracay” hasta sa Mayo 1.
Gin-organisa ro “Love Boracay” bilang kabaylu it sikat nga LaBoracay nga nagahakot it libu-libong mga turista kada dag-on.
