KALIBO, Aklan–Naging madinaeag-on ag kabuligan nga naging matawhay ro pagselebrar it Love Boracay 2022.
Suno kay Malay Tourism Officer Felix Delos Santos it Malay Tourism Office nga mas gintaw-an it importansiya sa nasambitan nga selebrasyon ro may kaangtanan sa environmental awareness.
Kasunod kara nagpatigayon sigon sanda it clean-up activity sa underwater ag coastal area sa Isla.
Nay mga gin-conduct man sigon nga seminar ag orientation angot sa paghaeong sa dunang manggad.
Sa pihak nga parte, ginpahayag man ni Delos Santos nga ko nagtaliwan nga Abril hay nakalista it kabilugang 186,747 nga mga turistang nagbisita sa Boracay.
Haeos maeapit eamang sigon raya kung igakumpara sa nailistang kapin sa 200K kada buean kat owa pa nag-eupok ro pandemya.
Samtang, kapin man sa 4,527 ro mga nailistang foreign tourist nga nagbisita sa Boracay kun sa siin kaabuan kara hay maghalin sa USA ,Germany ag UK.
