KALIBO, Aklan—Nagahinugyaw makaron ro mga Amerikano kasunod sa madinaeag-on nga pagdeklara kay Joe Biden bilang ika-46 nga presidente it Estados Unidos ag kay Kamala Harris bilang kauna-unahang babaye, Black American, ag Asian-American nga magiging bise presidente.
Suno kay Bombo International Correspondent Juliana Olmitte sa Chicago, Illinois nga haeos tanan nga estado hay may victory party para kay Biden bangud nga ginapatihan nga naangkon nanda ro demokrasya halin sa pagdumaea ni incumbent US president Donald Trump sa pagiging authoritarian kara.
Suno pa kay Olmitte, haeos tanan nga ulihing henerasyon hay nagpasakop sa eleksyon ag nagpabor ro mga raya sa tambalang Biden ag Harris.
Ro problema eamang sigon makaron hay uwa it planong magconcede si Trump ag pursigido ro anang kampo nga magpasaka it reklamo sa korte suprema agud nga kwestyunon ro kadaeag-an ni Biden ag ginainsister ro dayaan sigon nga natabo sa nagtaliwan nga eleksyon. Si Biden ag Harris hay nakataeanang magapanumpa sa Enero 2021.
