KALIBO, Aklan — Gin hayag it pamunuan it Department of Social Welfare and Development (DSWD) region 6 nga nag umpisa eon nga magpangayu kanda it educational assistance ro mga apektadong residente it Boracay closure para sa naga hilapit nga pagbukas it klase.
Suno kay Asuncion Santiago it DSWD-6 nga masaming gina pangayu kanda it mga ginikanan ro pambakae it mga school supplies it andang mga unga sa elementarya hasta sa senior high school.
Gin pahayag dugang kara nga padayun sa gihapon ro pagbuhos it mga residente ag trabahador sa andang operation center para sa naga kaigong assistance.
Sa idaeum it Assistance to Individuals and Families in Crisis Situation (AICS) program it DSWD, ro mga apektadong residente ag trabahador sa temporaryong pagpasara sa isla hay magabaton it medical, educational, burial ag transportation assistance bilang insigidang ayuda ukon safety net para sa madasig nga pagbangon sa krisis.
Gina request it ahensiya nga kompletuhon ro andang papeles agud mapadasig ro pag-release it andang assistance.
