Kalibo Aklan ——-Owa it anuman nga pagbag-o sa mga protocols para sa mga naga-uli nga Locally Stranded Individuals (LSI’s) sa probinsiya it Aklan.
Raya hay kasunod it napabalita nga magapatuman it daywang domingo nga travel moratorium sa Western Visayas .
Suno kay Ibajay Mayor ag League of the Municipalities of the Philippines (LMP) Aklan Chapter President Jo-en Miraflores nga nagapabilin ro direktiba ni Governor Florencio Miraflores sa mga shipping line companies, Philippine Coast Guard ag Philippine Ports Authority nga bawae nga makasueod sa anuman nga pantalan it Aklan ro mga Authorized Persons Outside Residence (APORs) ag LSI’s mag-eowas eamang kon may pahanugot halin sa Provincial Government eabi eon kon halin sanda sa low ukon may moderate nga kaso it COVID-19 .
Gindugang pa ni Mayor Miraflores nga required nga magsumite ro mga LSI’s it travel authority halin sa Joint COVID-19 Shield, negatibo nga resulta it RT-PCR test ag Certificate of Acceptance halin sa LGU’s nga may nagakaigo nga koordinasyon sa natungdan nga Barangay.
Obligado man sigon ro mga raya nga magpaidaeum sa daywang domingo nga home quarantine ukon sa gintaeana nga ligtas covid center it sangka LGU.
Sa pihak nga parte, nagapabilin nga instrikto suno kana ro border control sa banwa it Altavas , kun sa siin, tanan nga mga nagasueod nga biyahero hay ginapaidaeum sa digital checklists para sa madasig nga contact tracing .
Samtang, Ginpasaeamatan man ni Mayor Jo-en ro Bombo Radyo Kalibo sa naging partisipasyon kara sa madinaeag-on nga blood letting activity it LGU Ibajay ko adlaw it biyernes kaibahan ro Phippine Red Cross (PRC) Aklan Chapter .
