Preparado eon ro mga atleta it Negros Occidental nga sumabak sa nagkaeain-eain nga sporting events it Western Visayas Regional Athletic Association ukon WVRAA Meet 2023 nga maga-umpisa sa Abril 26 hasta it 30.
Suno kay June Aguilay, camp director it Negros Occidental delegates nga antes pa man sanda nagbyahe paadto iya sa Aklan hay nakondisyon eon ro andang mga atleta ag sangkiring adjustment eon lang ro ginhimo pag-abot nanda iya.
Angot kara, eubus man ro anang pagpasaeamat sa lokal nga gobyerno it Banga ag sa pamunuan it mga eskwelahan nga nag-abi abi sa andang pag-abot.
Kabilugan nga 847 ro delegasyon it nasambit nga probinsya nga ginakomponeran it athletes, coaches, trainors, ag committees.
Raya eon sigon ro pang siyam nga dag-on nana bilang camp director ag sa ulihing WVRAA nga ginpatigayon sa probinsya it Capiz hay sanda ro nagkampeon.
Kilaea man sigon ro Negros Occidental nga sa maskin anong sporting events hay nagapangibabaw rason nga pursigido sanda nga maboe it uman ro kampeonato makaron nga season it WVRAA meet.
