Puspusan eon ro pag-ensayo it mga atletang kwalipikado ag kaibahan sa Philippine delegation para sa maabot nga Southeast Asian Games nga pagahiwaton sa Mayo 5 hasta it 17 sa Phnom Penh, Cambodia.
Sambilog sa mga ginabantayan nga hampang nga makabuoe it bueawan nga medalya para sa Pilipinas hay ro Pencak Silat kon sa siin lima ro atletang halin sa probinsya it Aklan nga ginakaeakipan nanday Hanna Mae Ibutnande; Shara Julia Jizmundo; Jasper Jay Lachica; Zandro Fred Jizmundo Jr. ag Francine Padios.
Ro nasambitang mga atleta hay hinasa ag sinaea it husto sa idaeom it Philippine Lighting Speed – Pencak Silat Aklan.
Suno kay Hanna Mae Ibutnande, sangka bronze medalist nga presente sanda makaron nga naka-isolation training sa Lipa, Batangas sa idaeom it pagdumaea it Philippine Sports Commission ag magabuhay ro andang ensayo hasta gid nga makaeopad sanda paadto it Cambodia.
Tuyo kara nga maging mentally ag physically fit and capable sanda hasta sa pag-abot it kompetisyon bangud nga ro nasambit nga hampang hay nagakinahang-ean it grabeng abilidad ag kahauman para makuhit it mga raya ro bueawan nga medalya para sa nasyon.
May kaangtanan kara, nag-apela man imaw it suporta ag pangamuyo bukon eamang it sa mga aklanon kundi maging sa bilog nga pumueoyo it Pilipinas para sa kadaeag-an nandang mga atleta bukon eamang it sa hampang nga pencak silat kundi maging sa nagkaeain-eain pa nga sporting events.
Madumduman nga ro Pilipinas hay una sa pang ap-at nga pwesto sa medal standing nga may kabilugang 227 nga medalya nga ginakaeakipan it 52 nga gold, 70 nga silver ag 105 bronze medals.
