nagbunga ro pagpahaum nga gin obra it mga atleta it Pilipinas nga sumabak sa kauna-unahang Kun Bokator Championship sa Southeast Asian Games sa Phnom Penh, Cambodia.
Sa interview it bombo radyo kalibo, pareho nga ginpahayag nanday Angel Derla, gold medalists ag mark james lacao, silver medalist sa nasambit nga hampang nga naging kabado sanda bangud nga bukon kanda it pamilyar ro hampang.
Tradisyonal nga martial arts sa Cambodia ro kun bokator kun sa siin ginapakita ro maeapitang hand-to-hand combat, ground technique ag paggamit it nagkaeain-eain nga armas.
Kapareho ro combat fighting it kun bokator sa kickboxing apang mabahoe ro kinaiba it daywa sa hand movement.
Nasayuran nga si derla hay sangka pencak silat practitioner samtang si lacao hay sa patag it combat sports it pencak silat man.
Suno kay Derla nga haeos daywang buean sanda nga nag-isolate training ag gintun-an it husto ro kun bokator.
Proud suno kana imaw ag memorable ro anang pagdaog bangud nga ro napierde nana partikular sa single bamboo shield form event hay pambato it Cambodia nga si Chanchhprvy Puth kon siin kanda nag-originate ro hampang.
Si Derla hay first time nga nagpasakop sa Seagames samtang si Lacao hay pangaywang beses.
Sa pihak nga parte, ginpahayag man ni Lacao nga hasta sa makaron hay indi pa imaw makapati bangud nga first time man nana nga nagpasakop sa event.
Apang pinaagi sa disiplina ag bulig it andang mga coaches hay nagmadinaeag-on imaw kaibahan ro iba pang pinoy nga atleta.
