KALIBO, Aklan—Mas pang nagtaas ro numero it insidente it spousal violence ukon ro mga babayeng ginasakit it andang asawa ukon ka-live in partner.
Suno kay Engr. Lorna Cawaling, tagapaghambae it Aklan Gender and Development nga raya hay bangud sa ginapatuman nga community quarantine sa nagkaeain eain nga parte it nasyon agud malikawan ro pagkalhit pa it Coronavirus Disease2019 ukon COVID-19.
Pila eamang sa pamaagi it pagpanakit sa mga kababayin-an hay ro pagsampae, pagtueop ag pagpangbato.
Apang nagaguwa man sa survey nga may mga babayeng nagabalik sa gihapon sa andang partner maskin pa nga ginasakit raya.
Madumduman nga ko nagtaliwan eamang nga buean, nakalista ro Philippine National Police (PNP) it masobra 1,400 nga kaso it gender-based violence samtang ginpaidaeam sa lockdown ro nasyon bangud sa peag it (COVID-19).
Ginaeauman man nga magataas pa ro nasambitan nga datos bangud maabo sa gihapon ro ginabawaean nga makaguwa sa andang panimaeay.
Sa mga gustong magreport, pwedeng magtawag sa 117 hotline it PNP.
