Sa tunga it masadyang selebrasyon it Chinese New Year para i-welcome ro dag-on nga bugana ag masadya, may mga tradisyon ag pagpati ro mga Chinese agud nga tabugon ro kamalasan.
Raya ro ginpahayag ni Sandra Besana Daliva, Bombo International News Correspondent sa Hong Kong.
Suno kana nga kaeabanan nga gina-obra it mga Chinese agud nga maga-dere-deretso ro pagsueod it swerte hay ro paglikaw sa pilang mga bagay nga ginakabig nga “taboo” ukon mga indi dapat obrahon sa pagsug-aeaw sa mismong adlaw it Chinese New Year.
Raya hay ro paghambae it mga kataga nga may negatibong kahueugan kapareho it kamatayon, sakit, pagkaduea, malas, moeto, ag iba pa.
Madahan man sigon sanda agud nga indi makabasag it anuman nga gamit makaron nga adlaw.
Owa man sanda nagapanilhig sa actual celebration it Chinese New Year bangud nga matsa ginasilhig man sigon kara ro swerte.
Owa nagagamit it mga mataeum nga bagay kapareho it gunting ag kutsilyo bangud nga matsa ginaputoe sigon kara ro swerte.
Kaeabanan nga owa man nagapaligos ro mga Chinese ukon nagapa-utod it buhok sa unang adlaw it Chinese New Year agud nga indi sigon maduea ro swerte.
Ginpahayag ni Daliva nga raya man ro rason kon ham-an nga sarado ro haeos tanan nga hair salon kada Chinese New Year.
Mag-eowas kara bawae man sa babayeng may sarili eon nga pamilya nga magbisita sa baeay it anang mga ginikanan kamana man nga bawae sanda nga mag-utang ag magsukot it utang, mag-inom it bueong, magtau it New Year blessings sa tawong naka-eubog , indi pagpatangison ro unga ag maabu nga iba pa.
Samtang, sa sueod it 16 diyas nga selebrasyon ro unang pitong adlaw ro ginakabig nga public holiday rason nga hilway sanda nga makaangkon it maeawig nga bakasyon ag kaeabanan hay nagabiyahe paguwa it China.
Ro selebrasyon hay magatapos sa Lantern Festival sa Pebrero 12.
