KALIBO, Aklan—Ginpaathag ni Kalibo Vice Mayor Dr. Cynthia Dela Cruz nga ro mga bakuna nga gin-obra agud nga suk-ean ro Coronavirus Disease 2019 ukon COVID-19 hay epektibo.
Haeos 80 porsiyento suno kana it bakuna hay owa it seryosong side effects.
Mataeupangdan suno kana ro side effects it bakuna sa pagturok sa ikaywang dose nga sang buean ro distansiya matapos nga maturukan it unang dose.
Kapareho it ibang ordinaryong bakuna suno kana, posibleng makaangkon it pagsakit it butkon, eagnat, sakit it ueo, ukon pamatyagan nga matsa ginagaoy pagkatapos nga mabakunahan.
Suno kay Dr. Dela Cruz nga raya hay senyales nga naga-gana ro bakuna.
Ro mga may allergy suno kana sa bueong ag mga pagkaon hay pwede man nga mabakunahan apang magahueat pa it 60 minutos agud nga engkasong may reaksyon hay mataw-an eagi it anti-allergy medication.
Nagpapirma sigon it indeminity clause ro mga manufacturing company it bakuna nga nagakahueugan nga owa sanda it anuman nga saeabton engkaso nga makaangkon it grabeng side effect ro igaturok nga bakuna.
Apang nagpromisa ro atong gobyerno nga sanda ro magasabat sa gastuson.
Maangkon eamang suno kana ro herd immunity it kaabuan nga populasyon ukon 60 hasta 80 porsiyento kon makaangkon it proteksyon kontra sa virus.
Ginduea man ni Dr. Dela Cruz ro pagkabaeaka it publiko nga nagaduha-duha pa nga magpabakuna bangud nga ro mga vaccines suno kana hay nag-agi sa mga clinical trials agud nga masiguro ro pagiging eowas ag epektibo kara.
Madumduman nga pormal eon nga gin-umpisahan ro vaccination program sa nasyon matapos nga nag-abot ro donasyon nga Sinovac vaccine halin sa China.
Sa banwa it Kalibo, ginatantiya nga makaron nga buean it marso hay maga-abot man ro bakuna nga himo it AstraZeneca.
Gin engganyo pa ni Dr. Dela Cruz ro mga pumueuyu nga magpalista agud nga maka-avail it libreng bakuna halin sa gobyerno.
Apang maskin nga may covid vaccine eon suno kana hay dapat sa gihapon nga mag-dahan pinaagi sa pagsuksok it face mask ag face shield ag ipabilin ro sang metro nga distansiya sa kada isaea.
Samtang, aminado man si Dr. Dela Cruz nga bangud sa dengvaxia controversy rason nga nakaangkon it phobia ro publiko sa bakuna.
