KALIBO, Aklan —- Nagkaeain-eain nga klase it mga bala ag baril ro narekober it mga otoridad sa ginpatigayon nga raid sa sangka panimaeay bandang alas-5:00 kaina it aga-aga sa Brgy. San Dimas, Malinao.
Ro operasyon hay ginkasa it gintingub nga pwersa it Criminal Investigation and DetectionGroup ukon CIDG-Aklan ag Malinao Municipal Police Station gamit ro search warrant.
Sa paghaeughog sa baeay it suspek nga si Sonny Iyoyo Sr., 54 anyos, sangka Barangay Tanod ag residente it nasambit nga lugar , narekober ro sangka unit it 38 kalibre nga baril; sangka unit it kalibre 22, sangka magazine it kalibre 45 , sangka toy gun, sangka unit it kalibre 22 nga airgun ag nagkaeain-eain nga mga bala.
Samtang, hugut nga ginpamalibaran it suspek nga imaw ro nagapanag-iya sa ibang mga nakita nga armas.
Suno kana nga sangka unit it 22 revolver ag eskupita eamang ro nakita sa raid ag planted eon ro ibang items.
Ro anang mga armas sigon hay puro samad eon bangud nga ginapanag-iyahan pa raya it anang namatay nga ama.
Ro suspek hay presenteng nakakulong sa Malinao PNP Station ag magapangatubang sa kasong pag-eabag sa RA 10591 ukon mas kilaea sa tawag nga Comprehensive Firearms and Ammunition Regulation Act.
Sa pihak nga parte, ginpahayag ni P/Capt Donnie Magbanua, Hepe it Malinao PNP station nga may nabaton sanda nga impormasyon nga ro suspek hay naga angkon it mga bukon it lisensiyadong baril rason nga insigidang ginpatigayon ro operasyon.
