KALIBO, Aklan—Narekober it mga trabahador it sangka junk shop ro mga bala nga nakasueod sa sangka flashlight sa C. Quimpo St., sa banwa it Kalibo.
Insigidang gindaea ni Richmond Torre, 32-anyos ag caretaker it nasambit nga junk shop sa Kalibo Police Station ro tatlong bala it 50 kalibre ag sangka bala it M16.
Ginasugid nga samtang nagakamada it mga boteng plastic ro mga trabahador kat mataeupangdan ro sangka flashlight nga plastic nga ginsudlan it mga bala.
Indi eon matumod it tag-ana it junk shop kon sin-o ro nagdaea ag nagbaligya kana kara bangud sa kaabuon it tawo nga nagasueod-guwa sa andang pwesto.
Sa pagdumaea makaron it Kalibo PNP ro nasambit nga mga bala para sa nagakaigo nga disposisyon.
Abiso man it mga awtoridad sa publiko nga insigidang makipag-angot sa pulisya engkaso nga may makitang eksplosibo ukon makadueudang bagay.
Madumduman nga narekober man sa nasambit nga junk shop ro sangka mortar may pilang dag-on eon ro nagtaliwan.
