KALIBO, Aklan—Naga-abot eon sa 12 nga barangay sa probinsiya it Aklan ro nadeklara nga nalimpyuhan eon halin sa illegal nga droga.
Suno kay PDEA Region 6 spokesperson Shey Tanaleon nga raya hay makabig nga mataas nga numero rason nga ginadayaw kara ro mga pagpursige it mga otoridad.
Sa banwa it Banga, daywa nga barangays ro nakaangkon it drug-clear status nga ginaeakipan it Brgy. Poblacion ag Mambog.
Nadugang sa Kalibo ro barangay Pook samtang sa banwa it Malay hay ro barangay Argao, Caticlan, Napaan, Poblacion, Cubay Norte ag Sur, ag sa banwa it New Washington hay ro Cawayan, Tambak ag Ochando.
Ginpaathag ni Tanaleon nga ro drug cleared barangay hay dating natumod bilang drug-affected ag ginpaidaeum sa drug clearing operations ag ko ulihi hay gindeklarang clear eon halin sa anuman nga illegal drug activities.
Nakapasar sigon ro mga raya sa parameters it committee nga ginaeakipan it Department of Health, Philippine National Police, Philippine Drug Enforcement Agency ag Department of Interior and Local Government.
Ro mga parameters hay ginaeakipan it aktibong partisipasyon it barangay officials sa anti-drug activities ag iba pang programa, owa it anuman nga drug laboratories, marijuana cultivation sites, drug dens, protector, financier, ag drug pusher ag user kamana man nga owa eon it nagalibot nga supply it droga sa mga barangay sa idaeum it Dangerous Drugs Board (DDB) Regulation 3 Series of 2017, ukon mas kilaea sa tawag nga Strengthening the Implementation of Barangay Drug Clearing Program.
