KALIBO, Aklan — Armado it search warrant, sinalakay it mga operatiba it Provincial Intelligence Branch ag New Washington Police Station ro sangka baeay sa Sitio Bogacay, Brgy. Jalas sa banwa it New Washington.
Kaibahan sa nabo-oe sa panimaeay it suspek nga si Jimmy Ramos, 61 anyos ag residente it nasambit nga lugar ro sangka .38 nga revolver, sangka granada ag nagkaeain-eain nga bala.
Sa pihak it mga narekober, hugut nga ginpamalibaran it suspek nga imaw ro nagapanag-iya it nasambit nga mga items.
Suno kay P/Major Bernard Ufano, hepe it PIB-Aklan nga pagakasuhan ro suspek it pag-eabag sa Republic Act No. 10591 ukon Comprehensive Firearms and Ammunition Regulation Act ag separadong kaso sa pag-angkon it pampasabog.
Madumduman nga si Ramos hay nauna eon nga nakulong bangud sa kasong homicide, apang nakapiyansa matapos nga maeakot sa pagbaril-patay kay Roljun Ramos samtang nagasarado it anang meat shop ko nagtaliwan nga Agosto 17, 2019.
Imaw ro ginaturo ni Mrs. Perlyn Tejada, 32 anyos asawa it biktima nga si Roljun nga nagserbing driver it getaway vehicle it owa pa makilaea nga gunman nga nagbaril sa anang mister.
Si Roljun hay dating naaresto bangud sa pagduso it shabu samtang si Ramos hay sangka drug surenderee.
