KALIBO, Aklan—Nagapabilin nga blangko ro barkada ag pamilya sa naging rason it 21 anyos nga eaeaki nga nagbigti-patay sa Barangay Linabuan Sur, Banga kahapon nga adlaw it Lunes, Nobyembre 8.
Suno sa sambilog nga barkada it biktima nga si alyas “Juan” nga owa man raya it naisugid nga maskin anong problema kanda.
Antes sigon natabo ro insidente hay nag-inoman pa sanda sa baeay it sambilog nandang barkada.
Masadya pa sigon sandang nagasueonlogan samtang nagainom-inom apang medyo nahalata man sigon nanda nga problemado ag nagahinipos eamang ro biktima.
Alas-12 it udto adlaw ko Dominggo kat nag-umpisa sigon sanda it pag-inom ag nakaubos it kapin sa an-om nga bote it aeak.
Alas-7 it gabi-e hay nag-uli eun sigon ro biktima sa anang baeay.
Ginkakibot man sigon nanda nga pagka-agahon hay nabalitaan eun lang nga patay eun ro biktima matapos nga magbigti gamit ro higot it manok nga anang ginkabit sa puno it aratiles.
Samtang ginpahayag man dugang ni alyas “Juan” nga ro anang pagkakilaea sa biktima hay sangka maboot nga unga, mahipos ag owa gid nagapamalibad kung may ginasugo kana.
Samtang kung may problema ka ag gusto mo it kaistorya,puwedi kang tumawag sa:National Center for Mental Health Crisis Hotline (NCMH-USAP) sa 0917-899-USAP (8727) ukon sa 7-989-USAP (8727).
Puwedi man nga magtawag sa Hopeline PH 24/7 hotlines: 0917-558-4673 (Globe), 0918-873-4673 (Smart), 2919 (toll-free for Globe and TM).
Samtang ginsaysay man it igkampod it biktima nga si “toto” nga hasta makarun hay indi sanda makapati sa nahimo raya it anang first cousin.
Apang aminado man raya nga mabuhay eun nandang nahalata nga medyo problemado ro nasambitan nga biktima.
