KALIBO, Aklan–Kapareho it ginaeauman it Philippine Coast Guard, bumuhos ro numero it mga beachgoers sa mga baybayon partikular sa bilog nga Western Visayas.
Raya hay kasunod it selebrasyon it kapistahan ni Sr,. San Juan de Bautista kahapon nga adlaw it Sabado.
Ginpahayag ni CG Cmdr. Jansen Benjamin tagapaghambae it Coast Guard Western Visayas nga raya hay bangud sa balik eon sa normal rong tanan matapos ro mga restrictions nga ginpatuman kasunod man it pagpaeanasa it COVID-19 pandemic.
Apang mas maabu sa gihapon sigon ro volume it mga tawo dati kat owa pa it pandemya kumpara sa makaron nga tiempo.
Angot kara, 24/7 nga nagamonitor ro mga coast guard personnel ag nagkaeain-eain nga ahensya it gobyerno sa tanan nga baybayon eabi eon ag natiempo nga weekend rong nasambit nga kapistahan.
Padayon sigon ro andang pagpadumdum ag paabot it awareness sa mga beachgoers para malikawan ro mga insidente sa baybayon partikular ro drowning incidents.
Sa makaron, nagapadayon ro assestment it Coast Guard Western Visayas angot sa kakatapos eamang nga selebrasyon.
Sa pihak kara, nagaeaum sanda nga magabuhos pa gid ro mga tawo makaron nga adlaw it Dominggo sa tagsa ka mga baybayon sa andang lugar.
Padumdum ni Benjamin sa publiko nga indi eon pagpiliton nga magpaligos sa baybayon ukon siin man kung sa idaeom eon it impluwensya it alak ag likawan nga magmaneho it anumang behikulo kun nakainom para malikawan man ro nagkaeain-eain nga aksidente.
