Pagkatapos it bagyo, baha, linog ukon anuman nga kalamidad, nagatuhaw ro mga bentahosong negosyante.
Pagapanipuslan it mga raya ro kahigayunan agud nga kumita it mabahoe makaron nga maabu ro naduea-an it baeay ag kinahangean it pagkaon.
Magakita sanda it maabu nga kwarta sa andang mga ginabaligya bangud nga owa it pagapili-an ro mga tawo.
Maskin nga mahae, magabakae ro mga raya bangud nga eubus nga kinahangean.
Ro pagbantay it Department of Trade and Industry (DTI) sa mga lugar nga nahalitan ni Karding hay dapat nga pabaskugon.
Siguradong pagapataasan it mga ganid nga negosyante ro presyo it andang produkto particular ro pagkaon ag mga pagagamiton nga materyales para sa pagpatindog it mga nasamad nga baeay.
Owa sa andang bokabularyo ro kaeao-oy sa isigkatawo bangud nga ro kumita it maabu ro andang ginahandum.
Kadungan sa pagbulig sa mga nabiktima it Bagyong Karding sa Quezon, Aurora, Bulacan, Pampanga ag Nueva Ecija, dapat nga bantayan ro mga bentahosong negosyante sa mga nasambit nga lugar.
Indi pagpasugtan nga uman nga mabiktima ro mga nabiktima eon it bagyo.
Indi sanda dapat nga pabay-an sa makarondaya nga sitwasyon.
