Gintugyanan eon it clearance it Bureau of Fire Protection ukon BFP-Kalibo ro mga biktima it nag-eontad nga sunog sa Brgy. Tigayon, Kalibo nga nagapabutyag nga puwedi eon sanda nga makabalik sa andang mga nasunog nga panimeay.
Suno kay Punong Barangay Gil Morandante nga eubos ro andang kalipay bangud daeayon eon nga maka-umpisa sa pagtukod it andang mga panimaeay ro anang mga constituents nga nasunugan.
Maghalin sigon sa mga donasyon it mga indibidwal, grupo, ahensya ag mga natungdan it gobyerno hay nakabakae sanda it mga materyales para sa pagpatukod it baeay.
Ginhueay-hueay eamang sigon nana ro mga materyales sa tanan kutob sa masakop bangud sa limitado eamang ro mga raya.
Ginpaathag pa kara nga bangud sa kamahae it mga materyales makaron hay sangkiri eamang ro andang nabakae ag hapanupod.
Sa makaron, antes nga bukon pa it tapos ro andang mga panimaeay hay temporaryong una sa covered court naga-tinir ro mga biktima it nasambit nga sunog.
Nagapanawagan man si Kapitan Gil it bulig sa mga tawo nga may mabinueawanon nga tagipusuon nga kungta hay mabuligan pa gid ro anang mga nasakopan para matapos eon ro andang mga panimaeay ag daeayon eon nga makauli.
