KALIBO, Aklan—Pilang oras antes nga magbag-ong dag-on, maabu nga mga bilog nga prutas ro nagtaas ro presyo bangud sa sangkiri nga supply.
Naka-ugalian eon it maabu nga mga Pinoy ro pagbakae ag pagpahaum it mga bilog nga prutas sa pagsug-aeaw it Bag-ong Dag-on bangud sa pagpati nga suwerte ro mga raya.
Suno kay Bengbeng Fajutag, tindera it prutas sa Kalibo Shopping Center nga kaibahan sa mga nagmahae nga prutas hay ro peras nga dating napueong piso hay 20 pesos eon makaron; ro seedless grapes nga dating 240 peso hay 280 pesos eon ag ro may busoe nga ubas, halin sa dating 150 hay naging 200 pesos eon.
Samtang, owa eon suno kana it supply it kiat-kiat.
Bastante pa suno kana ro supply it chico, dalanghita, lanzones, melon ag pakwan.
Ro mga prutas suno kana nga owa naghueag ro presyo hay ro mansanas ag ponkan nga nagapabilin sa 10 peso.
Suno kay Fajutag nga gulpi nga nagataas ro presyo it mga ginabagsak kanda nga prutas umpisa kahapon ag makaron nga adlaw rason nga owa sanda it mahimo kundi nga nagadugang man it presyo.
Samtang, mabahoe ro andang pagpati nga makabawi sanda makaron nga dag-on bangud sa pagbuhos it mga bumaeakae maskin nga mataas ro presyo it mga prutas.
