KALIBO, Aklan—Nakilaea eon it barangay council ro tatlong binatilyo nga ginaturo nga responsable sa pagpanghaboy it bato sa sangka rider nga sa mayad nga swerte hay owa natamaan bandang ala-1:00 it aga-aga it sabado, marso 1 sa national highway nga sakop it Barangay Laguinbanua East, Numancia.
Suno kay punong barangay Lalaine Tan nga matapos nga maka-abot kana ro nasambit nga impormasyon hay insigida nana nga ginmandu ro pagpatigayon it imbestigasyon sa pagpanguna it chairman it andang committee on peace and order kaibahan ro mga barangay tanod.
Pinaagi sa bulig it CCTV footage hay natumod nga puro dayo sa lugar ro nasambit nga mga menor de edad .
Ro sambilog sigon nga taga new buswang kalibo hay ginapaeskwela it anang guardian nga residente it nasambit nga lugar samtang ro daywang iba pa hay taga-Barangay Pusiw ag Camanci Sur.
Sa follow up operation it mga awtoridad, ginpaatubang ro nasambit nga mga children in conflict with the law ukon CICL kaibahan ro andang mga ginikanan ag guardian para sa nagakaigo nga counselling sa pagpanguna it municipal social welfare and development office ukon MSWDO.
Madumduman nga nauna eon nag-viral ro post sa social media it rider nga si Jisrel Nervar nga gina-alegar nga ginhaboy it bato it mga owa nakilaea nga indibidwal samtang naga-agi sa lugar sakay it anang motorsiklo agud kunta nga magsueang sa anang misis sa banwa it Kalibo.
Samtang, apela man ni kapitan lalaine tan sa mga ginikanan nga bantayan ro andang mga inunga ag giyahan samtang bata pa agud nga indi magtaeang it daean nga andang paga-agihan .
