Ginpasidunggan sa ginpatigayon nga special session it Sangguniang Panlalawigan it Aklan ro mga board members nga magatapos eon ro andang termino sa Hunyo 30.
Raya hay sanday Jose Miguel Miraflores, Esel Flores, Nelson Santamaria, Ramon Gelito, Juris Sucro, Soviet Russia Dela Cruz, Atty. Emmanuel Sodusta ag Atty. Harry Sucgang.
Samtang ro mabilin nga senior board members ag nailihir it uman sa ikatlo ag katapusan nga termino hay sanday Jay Tejada ag Nemesio Neron.
Ro mga outgoing SP members hay gintaw-an it plaque of recognition, talibong ag kahigayunan nga makapaabot it andang mensahe.
Sa pagpasidungog sa mga raya, ginbasa ro andang pila ka mga importanteng laye, resolusyon ag ordinansa nga ginpasa sa sueod it termino nga andang pagserbisyo sa publiko.
Sambilog sa mga naging emosyonal hay si Atty. Sucgang kon siin ginpasaeamatan kara ro anang mga naging kaibahan sa SP ag si outgoing Aklan governor Florencio Miraflores nga ginakabig nana nga master it pulitika.
Madumduman nga nagpailihir si Atty. Sucgang sa pagkakongresista sa unang distrito it probinsya apang napyerde kontra kay Congressman re-elected Carlito Marquez.
