BUSINESS News–Gindihon sa Senado ro daywang resolusyon nga tuyo nga paimbestigahan ro pagkalhit makaron it mga bukon it awtorisadong online ukon digital lending platforms ag ro abusadong kompanya nga nagapautang.
Sa Senate Resolution 641 ni Majority Floor Leader Joel Villanueva ag Senate Resolution 626 ni Senator Sherwin Gatchalian, ginapa-usisa sa mataas nga kapueungan ro pagkalhit makaron it mga bukon it rehistrado ag bukon it awtorisadong online lending platforms nga napabalitang maabu ro pagpang-abuso.
Ginplastar sa resolusyon ni Villanueva ro report it Securities and Exchange Commission angot sa sangkaterbang reklamong nabaton angot sa online lending companies nga ginapa-agi sa pagpanghadlok, pagpahuya, ag pagmueag ro pagsukot it utang.
Ginpamilit man it daywang senador nga maimbestigahan sa mas madaling tiempo ro mga polisiya sa online lending apps agud nga mataw-an it proteksyon ro mga tawong napipilitang mag utang kanda.
Gintumod man sa resolusyon ni Gatchalian ro report ko 2022 kun sa siin 35 percent ukon 3.7 million ro ginsaka ukon katumbas it 14.22 million ro na-monitor nga downloads sa digital lending platforms nga naga-operate sa Pilipinas kumpara ko 2021.
Raya hay nagakahueugan nga mas nag abu ro mga tawo nga nag utang gamit ro online lending platforms nga owa nasayuran ro rasonableng tubo ag ‘terms’ sa pagbayad it utang.
Nakabeahag man sa resolusyon ro mga napabalitang pagpang-harass, paghadlok , pagtawag sa mga kakilaea ag igbata it nangutang kon owa eagi nakabayad ag ro mabahoe nga interes nga ginapatong sa andang utang.
